香港有超過1400名特殊學習需要嘅學生,並喺宿舍部寄宿,响疫情下學校更加需要密密幫學生消毒物品。科大研發團隊就設計咗一個深紫外線(UVC)發光二極體(LED)消毒衣櫃,大大幫助到呢啲學校嘅消毒工作! 

科大機械及航空航天工程學系講座教授兼電子封裝實驗室主任李世瑋,去年8月起率領團隊研發大型嘅紫外光消毒產品。團隊將UVC LED燈安裝喺自主設計嘅多層矽反光杯中,製成等身高嘅消毒衣櫃,發現UVC反射幅度大幅增加,殺菌距離仲會提升超過5倍至26厘米,並將光源均勻地輻射出去,足以覆蓋衣物等物件表面。

消毒衣櫃以特殊封裝技術安裝,內部塗上能夠增加反射幅度嘅特殊反射塗料,另外其所發放嘅UVC波長係國際公認最具殺菌效能。李世瑋指,用家只需要將衫放入櫃中,開啟電源,就可以响1分鐘內殺滅衣物上百分之99.99嘅細菌病毒。 

呢項研發獲創科署為防控新冠病毒而設嘅「公營機構試用計畫」資助約83萬元,目前消毒衣櫃已經响保良局轄下3間特殊學校或其宿舍部試用。有份參與計劃嘅保良局余李慕芬紀念學校校長林國偉表示,衣櫃大大提升消毒成效,亦減輕咗前線員工嘅工作量。 

李世瑋表示,團隊會繼續探索新技術嘅應用範疇,例如具自我清潔功能嘅空氣淨化器、冷氣機、飲水機或掃地機器人等,並同業界合作開發更大型嘅UVC LED產品。 

圖片來源︰科大