唔少人都鐘意搭火車去旅行,貪佢經濟之餘又睇到沿途風景。內地首架以大熊貓為主題嘅移動火車酒店「熊貓專列」,首班車喺上星期日(28號)正式開通。呢架熊貓專列集交通、住宿、餐飲、娛樂、會議等多功能於一身,被譽為「移動的星級酒店」。

熊貓專列最多可容納252人,共12個車廂,其中8個係熊貓主題臥室,1個係熊貓餐廳車廂,1個係多功能娛樂車,1個員工休息車同埋1個發電車組成。熊貓專列車廂設有獨立洗手間、5G網絡,熊貓餐廳車廂仲可以根據需要化身移動會議室添。乘客除咗可以搭熊貓專列由四川成都市前往貴州遵義市外,亦可以喺車上打麻雀、唱卡拉OK、跳舞同沖涼,更可訂制下午茶會、主題歌會、雞尾酒會等服務。

四川成都鐵路國際商旅集團公司稱,熊貓專列初期主要行駛成都局集團公司轄下地區,即四川、重慶、貴州三省,後期將根據營運情況拓展至全國。

圖:中國鐵路