唔知大家有無試過倒立呢?倒立睇到嘅世界係顛倒嘅,普通人當然無可能一直倒立,不過巴西男子Claudio Vieira de Oliveira一出世就患有罕見疾病,令佢嘅頭部好似倒立咁一直倒轉,佢睇到嘅世界亦係顛倒嘅。Claudio出世嗰陣,醫生曾斷言佢無法活超過24小時,但佢無向命運低頭,唔單止已經活咗44年,仲成為勵志演說家,到處演講,又會參加基督教兒童教育志願服務,幫助弱勢兒童。

Claudio患有先天性多發性關節攣縮症(arthrogryposis multiplex congenita),令佢嘅四肢萎縮、無法站立,全身只能靠背部支撐,雙手只能放喺胸口前,頭部更要一直倒轉。醫生指佢活唔過24小時,但佢就奇蹟咁存活,日常呼吸、食嘢、飲水等,都無因此受影響。Claudio自7歲就只能跪喺地上,但佢無因此自暴自棄,由媽媽教佢讀書寫字,佢亦努力學習。

自2000年起,Claudio仲成為勵志演說家,出自傳、DVD,四圍去演講鼓勵更多人,又會參加基督教兒童教育志願服務,幫助弱勢兒童。近排因巴西新冠肺炎疫情嚴峻,佢好驚呢個病毒,所以已經在家隔離咗1年幾,只有必要時刻先會出門。佢期望疫情緩和後可以喺4月重新開始演講:「我還想繼續演講,而且要多活很多年。」

圖:FB@Claudio Vieira de Oliveira