俗話有話「塞翁失馬焉知非福」,日本京都金戒光明寺舊年開始喺寺院內擺放50隻烏龜小玩具做裝飾,由於玩具非常得意,隨後仲引起話題。直至今年2月初,寺院發現烏龜玩具通通消失咗。之後有善心人士捐咗50隻烏龜玩具俾寺院,點知又唔見咗,好彩有好心人帶住大量嘅黃色鴨仔玩具送俾寺院,而最後寺院更搵返最初失竊嘅烏龜玩具,可謂大團圓結局!

據日媒報道,日本京都市嘅金戒光明寺,由舊年12月開始放咗50隻烏龜玩具做裝飾,然而喺今年2月初,呢啲烏龜玩具不翼而飛。起初寺院仲以為可能係邊個攞走咗唔記得擺返原位。十幾日之後,有善心人捐咗50隻烏龜玩具,寺院於是又重新將烏龜玩具添上。點知喺3月初,烏龜玩具再次唔見,今次寺院幾乎肯定係有人刻意偷走嘅,於是喺社交媒體公布呢個消息。估唔到有好心人見到消息,即刻喺同一日下晝,帶住大量黃色鴨仔玩具送俾寺院,隔日仲加送咗烏龜玩具,令寺院又驚又喜。

最後喺某一日,有信徒聯絡寺院歸還咗當初遺失嘅烏龜玩具,寺院果然喺地藏雕像附近發現裝住失竊烏龜玩具嘅袋。雖然唔知到底係邊個拎走咗啲玩具,但最終都搵返,亦意外獲得其他善心人士嘅幫助,寺院表示都係靠大家嘅協助,先令事件圓滿落幕。

圖:FB@金戒光明寺