受新冠肺炎疫情影響,全球餐飲業大受打擊,一位嚟自美國馬里蘭州巴爾的摩嘅華裔餐廳店主朱冠宇依然秉持佢做餐廳嘅初心,就係傳遞愛心,而非盈利賺錢,「我吃苦了,別人就能吃上美味食物。」朱冠宇近日更揸車6個鐘,親自到佛蒙特州為一為肺癌晚期嘅顧客整佢最愛餐點——西蘭花天婦羅。 

早前朱冠宇收到一封嚟自佛蒙特州食客Brandon Jones嘅郵件,指其患肺癌晚期嘅媽媽一直好鐘意食佢鋪頭嘅西蘭花天婦羅,所以想向朱冠宇拎呢道餸嘅食譜。點知,朱冠宇竟然帶住所有食材,親自揸6個鐘頭車到佛蒙特州,炮製新鮮滾熱辣嘅西蘭花天婦羅送去Brandon媽媽屋企。

Brandon表示,住喺佛蒙特嘅媽媽,每次嚟巴爾的摩探佢,都會去朱冠宇鋪頭食一份西蘭花天婦羅,但舊年12月,媽媽因被診斷為肺癌晚期,之後就好難出行,Brandon話:「我們希望她在生命的最後階段能享受美食,因此聯絡朱冠宇,沒想到他如此慷慨,不遠千里親自送來她最愛的食物。」

朱冠宇嘅舉動唔單止感動Brandon一家,亦獲得眾多社區好評,對此朱冠宇只係謙虛咁話:「客人信任,就更需要承擔好自己的職責。」佢認為經營餐廳應該出於對食物、顧客同社區嘅愛,並非賺錢,「(經營餐廳的)本心是傳遞快樂,如果我不能快樂的經營餐廳,別人也無法從我的食物中獲得快樂。」

圖:IG@ekibenbaltimore