依家小學生真係幸福,學習資源咁多樣化! 

香港教育大學科學與環保學系推出常識科嘅網上學習資源「常識小劇場」,以短片同網上工作紙形式,講解圍繞小學常識科學習範疇嘅主題,首個系列以新型冠狀病毒為主題,分6項題目,包括「新冠肺炎與感冒沒分別?」、「糞便是否一無是處」及如何分辨新聞真偽等。

首個系列以「新型冠狀病毒肺炎疫情」為主題,6個卡通短片以「葉子偵探」同教大學生作互動,拆解日常生活中常見謬誤,每段短片都係由獲「行政長官卓越教學獎」嘅教師參與及講解,達成「看短片、學常識、解迷思」。

每個主題下都有公開嘅網上工作紙,完成後提交就可以獲得正確答案。其中一個主題為「新冠肺炎與感冒沒分別?」,除相關基本知識如佩戴口罩、如何減低感染病毒風險外,亦教人分辨疫下流傳坊間嘅資訊,例如多戴幾層口罩可唔可以加強保護等。當中亦引述咗疫情期間出現嘅假信息,如港府將發出「禁足令」、廁紙同米缺貨等。

教大校長張仁良表示,今次推出嘅網上學習資源正好支援網上教學嘅「新常態」。另外,科學與環境學系教授蘇詠梅補充,「常識小劇場」將會陸續推出唔同主題系列嘅短片,包括氣候變化、智慧城市、STEM世代優質生活等。

短片詳情可參閱︰【常識小劇場】

圖片及資料來源︰香港教育大學