教育局今日(26日)宣佈全港幼稚園及中小學學校復活節假期後嘅面授課堂安排,學校可不多於全校學生人數三分二為限,而上課時間都係以半日為限。

至於每日嘅授課時間,中學方面,學校可安排個別級別嘅學生喺上午或下午回校,進行不多於半日嘅面授課堂,而學校唔可以安排同一級別學生進行全日課堂,避免學生出外用膳。小學方面,學校可以安排個別級別嘅學生响上午回校進行不多於半日嘅面授課堂。

幼稚園方面,上午班或下午班嘅幼稚園,可以安排個別級別嘅學童分別喺上午或下午回校進行半日課堂,而全日班嘅幼稚園可以安排個別級別嘅學童於上午或下午回校進行不多於半日嘅面授課堂。

教育局發言人又指,若個別學校能夠安排全校教職員定期進行病毒檢測,教育局會按該校嘅實際情況,考慮全校恢復半日面授課堂。現時,政府提供多個地點及模式,畀市民進行病毒檢測,學校教職員若果使用社區檢測中心嘅檢測服務,可獲豁免有關收費。 

另外,教育局提醒學校喺全校未恢復面授課堂及校內活動前,應採取適當嘅預防措施及相應安排,彈性運用唔同嘅教學模式教學,畀學生持續在家學習。而期間,學校應該如常保持校舍開放,畀家中缺乏人照顧嘅學生回校。

圖片來源︰FB@楊潤雄