正所謂姐妹情深,一方有難,另一方一定會幫忙。內地西安一個9歲女童患有重病,急需骨髓移植保命,只有4歲嘅妹妹嘅骨髓匹配,妹妹年紀雖小,但就勇敢捐骨髓:「姐姐病了,我要幫姐姐。」

9歲女童因患上再生障礙性貧血(又稱再生不良性貧血),生命受到威脅,最好嘅治療方法係做骨髓移植手術,而唯一骨髓配對成功嘅只有佢4歲嘅妹妹。當爸爸問妹妹願唔願意捐啲血救姐姐、但會有啲痛嗰陣,妹妹回應:「没事,我能忍。」

妹妹體重只有16kg,係西安交通大學第一附屬醫院見過年紀最細、體重最輕嘅骨髓供者,不過護士長林歡就大讚妹妹好勇敢。皆因採血過程長達4個鐘,期間腿部仲要一動不動,連大人都未必做得到,但妹妹就特別配合,不哭不鬧,仲不時同醫護人員交流。副護士長樊婷憶述,佢見到妹妹隔著病房窗探姐姐,同佢講加油,仲劃咗個心俾姐姐,呢個畫面令佢好感動。

圖:央廣網

(姐姐正接受檢查)


(妹妹透過玻璃窗睇姐姐)