寵物嘅衫仔、裝飾品越嚟越靚,可惜流浪貓狗們就無機會擁有,佢哋如果無人領養更可能要面臨人道毀滅。美國有個14歲少年Darius Brown喺4年前就開始幫動物收容所嘅貓貓狗狗整「煲呔」,希望增加佢哋被領養嘅機會

據外媒報道,Darius Brown喺10歲嘅時候,咁啱遇著颶風Irma肆虐美國,Darius發現好多災區嘅貓狗被送去佢屋企附近嘅收容所。當佢得知動物如果無人領養就好可能會被安樂死,於是佢決定用佢學咗2年嘅「技能」——用縫紉機,盡可能咁助佢哋一臂之力。

Darius唔係天生手巧嘅小朋友,佢喺8歲嗰陣仲被診斷出語言遲緩、認知遲緩同精細動作發展遲緩。佢嘅媽媽認為如果Darius學識裁剪面料就可以提升精細動作嘅技能,於是就請Darius嘅姐姐教佢做手工,Darius亦因此學識用縫紉機。Darius自細就鐘意打呔,亦會DIY送俾朋友,於是佢就諗到用「呔」就幫助動物們:「人們戴領結會看起來不錯,何不也幫狗和貓戴上領結呢?」

Darius至今已經整咗多達1000個領呔,每條製作時間約15分鐘。佢仲為名人嘅寵物整領呔,包括美國總統拜登隻狗狗。前美國總統奧巴馬見到Darius為收容所嘅動物努力嘅故事後,更曾發信讚揚佢嘅工作。Darius嘅媽媽提起囝囝亦感到驕傲:「他從小就心胸寬大,願意向他人伸出援手。我很欣賞他的所作所為,以及他對人和狗發揮的影響力。」

圖:IG@sirdariusbrown