被打工仔視為地獄嘅觀塘區,嚟緊四月會以新面目示人!42日裕民坊公共運輸交匯處正式啟用,仲係全港首個將巴士排隊位設喺商場室內,可以嘆住冷氣等車,真係令其餘17區「葡萄」! 

裕民坊公共運輸交匯處42日啟用

位於觀塘重建項目第二、三發展區嘅裕民坊公共運輸交匯處,42日正式投入運作。屆時,原本設於裕民坊同觀塘道嘅8條巴士線及21條小巴線,都會遷至呢個新嘅公共運輸設施接載乘客。 

新交匯處總面積達到1.5萬平方米,係全港最大嘅有蓋公共運輸交匯處。除咗規模最大,呢到嘅乘車設施仲結合多項創新同智慧元素,包括喺巴士總站設置首個應用「人車分隔」概念嘅冷氣候車區,以及响小巴總站安裝智能通風裝置以加強鮮風等,令乘客可以嘆住等車。

新交匯處分佈及設計

新嘅公共運輸交匯處有兩層,其中新巴士總站响項目基座一樓;地面層就係小巴總站。車站四通八達,有10個出入口,與協和街、物華街、康寧道及裕民坊四條地區主要街道連接;而呢啲出入口亦與商場內嘅24小時行人通道匯合,便利來自秀茂坪、牛頭角等周邊地區嘅居民,進出運輸交匯處。 

此外,巴士站嘅候車區,設置咗全港首個以人工智能操作嘅閘門控制系統,以全自動模式控制登車閘門開關;而設於地面層嘅小巴總站,佔地約9,000平方米,相等於原先區內各個臨時小巴站總面積嘅5倍。小巴總站將21條分散喺觀塘道、裕民坊、同仁街及協和街嘅專線小巴同紅色公共小巴線集合。 

有消息指,全新商場觀塘裕民坊「YM²」、裕民里同裕民市集都會喺4月開幕,但實際日子就未落實。 

圖片及資料來源︰市區重建局網誌


新巴士總站可以喺商場內侯車。


小巴總站安裝咗由本地企業研發嘅無扇葉通風裝置,能夠吹送高速氣流到總站內,令市民等小巴時冇咁焗熱。