對於愛車人士嚟講,自己架車被人刮花真係肉痛到爆!成都一個劉姓男子將愛車停喺醫院停車場,點知4日後發現多咗張紙仔,上面竟寫住「你的車被擦掛」,仲留低聯絡方式,表示願意賠償。最後,劉男致電肇事車主,並只要求對方賠償人民幣12蚊(約14蚊港幣)就好,令對方相當感動,事件亦完美解決。

因為妻子要生BB,劉男3月9號將自己嘅平治(Benz)停喺醫院停車場,到13號準備揸走架車嗰陣,發現車頭多咗一張紙,寫明自己撞花咗佢架車,仲留低自己嘅聯絡方式,叫車主聯絡佢解決。劉男檢查咗車身,見到左邊車頭有小小擦花,雖然唔係好明顯,但以愛車嘅價格嚟講至少都要花幾千蚊嚟修補。劉男隨後致電俾肇事司機黃姓男子,對方真誠表示願意賠償:「該咋弄就咋弄!」兩人喺電話入面交談愉快,劉男最後決定要對方賠償人民幣12蚊就好,黃男起初唔敢相信,呆咗一陣先回應:「懂懂懂!」隨後黃男用手機轉賬俾劉男,解決咗呢場糾紛。

劉男事後受訪表示:「會主動給你留條子,也說明是一個負責任的人」,「雖然不嚴重,但撞到車也算是出了事,12塊錢就相當於掛個紅嘛。大家都很好說話,大家都很負責任,有個寓意就對了嘛!」黃男之後接受訪問時表示,佢係個實事求是嘅人,既然事情發生咗就應該主動去承擔。自己經濟環境唔算好,佢亦知道對方架車唔平:「但當時也沒想那麼多」。

圖:紅星新聞