自從膠袋開始徵費之後,去唔少鋪頭買嘢,埋單嗰陣都會聽到店員問使唔使加錢買個膠袋,對店員嚟講算係多咗一道工序。不過日本就有間鋪頭好貼心,諗咗一個辦法出嚟,等客人同店員望一眼就知要唔要膠袋,有網民仲大讚呢個做法,希望其他鋪頭都可以跟住做添。

據日媒報道,有位網民喺社交網站分享,指自己近日見到一間鋪頭,門口擺住兩種唔同顏色嘅購物籃,仲設有告示牌,需要買膠袋嘅客人用橙色嘅籃,唔需要嘅話就用白色籃。

網民表示,呢種簡單嘅分類,可以避免埋單嗰陣店員再詢問客人,少咗工序之餘,仲可以加快埋單嘅效率。而且就成本上來講,店內本來就有準備呢啲簡單工具,唔需要再添置。網民希望呢個做法可以成為良好範例,其他鋪頭例如便利店、超市都可以跟住做。

網友紛紛留言表示讚同:「我就在便利商店打工,有這個絕對幫大忙」、「超市也應該引進」、「這樣店員就不用一個一個確認了」,但亦有人表示:「比起成本考量,可能店家空間才是問題」、「不過萬一是中途才想起來應該要購物袋……」。

圖:Twitter@redpeppers