唔少酒店都會提供一次性嘅鬚刨,雖然呢種鬚刨既方便又衞生,但佢哋一般都由塑膠製成,十分之唔環保。有見及此,日本廠商 Kai Group 近日就設計出一款名為 Paper Razor 嘅紙鬚刨,希望透過以紙張製作鬚刨嘅手柄,減少製造難以被大自然分解嘅塑膠廢物。


使用 Paper Razor 嘅時候,用家只需摺好鬚刨嘅側面及頂部即可。雖然 Paper Razor 嘅手柄改以紙張製成,但其獨特設計亦讓手柄留有一定嘅同強度和柔韌度。而手柄更可承受高達攝氏40度水溫,方便用家用溫水剃鬚或沖洗鬚刨。


除此之外, Paper Razor 嘅包裝更呈扁平狀,以減低運輸成本,以及運輸過程中嘅能源消耗,實行將可持續性納入到產品設計嘅一環。現時 Paper Razor 共有藍、紅、綠、黃,以及沙色5種顏色可供選擇,而5色套裝嘅價格則為8.65歐元(約港幣$80)。


圖片來源:Kai Group