大家以後又多一個好去處啦!位於薄扶林道141號嘅「薄鳧林牧場」,呢個活化建築將會喺年中完成。           

發展局局長黃偉綸於321日喺網誌中,介紹修復舊牛奶公司高級職員宿舍為「薄鳧林牧場」計劃,並指目前活化工程進展順利,預計今年年中完成。 

黃偉綸喺文中引述負責活化工程嘅建築師,指宿舍會活化作「博物館」。主樓會做展覽之用,展示舊牛奶公司嘅歷史,以呈現昔日牧場運作嘅情景,亦會展覽相關文物同器具,並會介紹薄扶林村及附近地方嘅歷史同文化特色。 

此外,項目亦會新建一座副樓,舉辦工作坊及作餐飲區。不同嘅體驗,畀參觀者感受傳統食物生產方式及現代化可持續嘅生活模式。而主樓與傭工宿舍之間嘅戶外地方就會增設露天劇場。 

據建築師指,當時外籍人士唔習慣香港潮濕嘅天氣,所以將建築物嘅下層升高,而牆上嘅「牛眼窗」有助通風防潮,並指屋內嘅古式壁爐、古典建築元素、木樓板都會保留。不過,建築物部分原有特色被修改過,例如主樓原本嘅斜屋頂被改為平頂,主樓遊廊亦被圍封,因此今次修復工程會盡力還原,以便欣賞項目原來嘅建築特色。

另外,為咗符合建築物消防安全守則及無障礙通道要求,項目新增一條可達至主樓一樓嘅斜道,日後維修保養費用較電梯平,其次係斜道旁邊係一望無際嘅南區海景,將來可以化身成觀景台。 

圖片及資料來源︰發展局局長黃偉綸網誌


舊牛奶公司高級職員宿舍由主樓、傭工宿舍及車庫組成。圖中為主樓,修復後會作展覽之用。


圖左係傭工宿舍;圖右係車庫。


舊牛奶公司高級職員宿舍活化成為「薄鳧林牧場」嘅構想圖。