早前一群熱愛香港人士發起咗一個名為「畫美麗香港」嘅計劃,希望將壁畫藝術帶入香港各區。而喺保良局方黃錦全小學、聖公會奉基千禧小學等多個地方繪製壁畫後,佢哋近日就去到上水,為鳳溪第一小學校園嘅外牆改頭換面,注入活力以及文藝氣息。


今次活動除咗透過壁畫創作為學校外牆大翻新之餘,更加邀請咗壁畫畫家去指導義工,教識佢哋一啲基本壁畫繪畫技巧。而鳳溪第一小學嘅校長朱偉林亦表示,今次嘅活動別具意義,希望壁畫可刺激學生發展藝術潛能,把正能量延伸至不同的社區同校園。


其實「畫美麗香港」嘅成立旨在增加香港各區環境的活力,為香港帶來和平、歡樂,以及培育大家對香港的歸屬感。同時佢哋亦希望壁畫可以成為打卡熱點,讓香港都有類似台中「彩虹眷村」、首爾「梨花壁畫村」嘅地方,協助推廣旅遊業。


圖片來源:畫美麗香港