雪糕最緊要係賣相靚、味道正,不過要突圍而出都要有小小噱頭。日本東京有間抹茶專門店就推出「嗆人抹茶軟雪糕」,主打「吃到嗆到」,幾乎個個試完之後都會噴出綠色噴霧,食到認真狼狽。

根據日本電視節目《月曜から夜ふかし》,東京一間抹茶專門店,大膽推出一款「殺人抹茶」雪糕,呢款「吃到嗆到」嘅雪糕竟然成為當地人困擾嘅食物。只見雪糕表面灑滿抹茶粉末,理應會令抹茶粉絲們欲罷不能,但就令唔少人避之則吉。點解呢?

節目邀請9位市民即場實測,個個食咗一啖之後都會被上面嘅抹茶粉末「濁親」,不斷狂咳,令抹茶粉末飛到周圍都係,望落更似試食者噴出綠色噴霧,噴到成塊面、衫褲、雙手都係抹茶粉末,相當狼狽。店長高津和彰接受訪問嗰陣更表示,「嗆人抹茶冰淇淋」原意就係要食到人「濁親」,先會加咁多抹茶粉末,佢仲相當有信心咁邀請大家嚟試下「殺人抹茶」雪糕嘅威力添。

圖:《月曜から夜ふかし》截圖、FB@長峰製茶町田根岸店