疫情持續,學校雖然有局部復課,但學生始終要繼續上網課。有家長疑因心痛子女每日都要學校屋企兩頭趕上堂,子女上網課亦學唔到嘢,斥網課無用,開始埋怨老師,甚至話佢哋「白𢭃人工」。有位老師網民喺網上分享自己上網課嘅經歷,為得唔到家長認可而感到難過,指自己準備網課、批改網上功課比以前上實體課所用嘅時間多得多。好多網民留言安慰該老師,明白老師用心良苦,感謝老師們嘅付出。

呢位老師網民喺網上討論區「親子王國」發帖指,佢係一間Band 2中學嘅主科老師,有教中一、中四同中六學生,佢同時亦係兩個小朋友嘅媽媽,明白唔少家長希望子女復課,但有感家長日日埋怨網課對小朋友無幫助。於是佢列出3項家長對老師嘅指控,逐一去澄清。

指控1:老師得閒無所事事

網民以自己為例,每日早上8點至下午1點要返學校上實體課同網課,下午又要為高年級補課同開會,網課準備時間比實體課更多,坦言全部都係心機時間:「為咗令學生更有興趣及專注,我哋要諗好多活動,舉例整個Kahoot玩15分鐘,但準備功夫隨時一兩個鐘,仲要將好多教材電子化,等學生睇得更容易。」

指控2:老師不批改功課

網民話佢嘅學生每日透過google classroom交功課,佢要喺平板電腦開來改,但「有時學生又scan得衰,有時好矇、有時cut緊啲字,我俾收到實體功課用多起碼一倍時間批改。」而自己批改作文嗰陣,更會每份都拍片俾意見學生,好花時間同心機。

指控3:老師不檢測不復課

網民指,校方無徵詢老師意願,唔安排老師接受檢測,但以佢所知,身邊嘅老師同事都願意檢測,希望盡快復課。

網民最後表示唔少家長「成日開口埋口話老師嘆慣,白𢭃人工,對於真心為學生付出的老師,聽到真係非常難過。」佢亦明白唔同人各有意見,只希望家長們都理性分析,互相尊重。網友們睇完之後,明白老師嘅辛酸:「有好多怪獸家長,唔復課又鬧,復課又話唔安全」、「明白上online lesson,老師教材差唔多要重新做過,online功課又冇得用返以前,又要準備一些有趣quiz」;有網友更仲分享自己子女嘅老師不如樓主咁用心備網課:「唔係個個老師都咁勤力盡責」;好多網民分享自己小朋友遇到好老師,更鼓勵一眾老師:「老師加油」、「支持所有為學生的好老師,包括樓主」、「互相指責不如相扶前行」。

圖:新華網