建設循環經濟及可持續嘅綠色生活環境,係近年來大眾都要面對嘅課題。 

政府(319日)就「塑膠飲料容器生產者責任計劃」進行業界及公眾諮詢會。環保署首席環境保護主任(廢物策略發展)蕭智慧指,現時本港每日平均棄置121公噸即棄飲品膠樽,估計要喺全港設置約1,200部入樽機或「按樽點」先可以處理到。 

另外,由於電子零件唔能夠日曬雨淋,入樽機要設置喺半室內,並會考慮喺「綠在區區」、街角商店等地方設立;至於較大量嘅膠樽,市民可以到「按樽點」經人手協助處理,唔洗用「入樽機」,以方便拾荒者。 

環保署助理署長(廢物管理政策)李可期表示,環保署喺今年第一季,推出咗為期一年嘅先導計劃,响全港分別設置60部「入樽機」,現時有40部運作中。又指反應不錯,7個星期已回收到30萬個膠樽,其餘20部「入樽機」會响今個月底前推出,主要設置喺政府設施、商場、大學。 

呢個計劃下,飲料供應商需要登記,並須按時繳付循環再造徵費。有飲料入口商問到點樣釐定收費,蕭指,擬參考現時「玻璃樽回收計劃」,會按飲品入口或生產容量收取循環再造徵費,而回贈就按膠樽數量,供應商要定期呈交入口量同生產量,再由政府計算收取金額。

圖片來源︰Unsplash@Nick Fewings