大家都知捐血可以救人,但就唔係個個都做得到,美國德州有位善心男子Marcos Perez就連續捐血37年!究竟係咩原因驅使佢咁堅持?

Marcos Perez表示,自己係早產BB,急需輸血救命,但60年代嘅醫院仲未有血庫,佢嘅爸爸為咗救佢四處懇求親友捐血。最後只有爸爸嘅其中一位朋友Tony Aguilar挺身而出,捐血救咗佢,從此改變咗佢嘅一生。

Marcos為報答Tony嘅救命之恩,同時傳承呢份善心,佢由1984年開始捐血,累計已捐血962次,幫助超過3000人。佢通常會捐血漿同血小板,因為咁可以令佢每年最多可以捐到24次血。Marcos Perez啱啱更成功立下累計捐出120加侖(約454公升)血液嘅里程碑,獲捐血站頒獎致謝。佢表示,捐血唔可以單靠一個人嘅力量,需要全部人一起努力。Marcos仲話佢會繼續本住「以生命影響生命」嘅座右銘,拯救更多人。

圖:South Texas Blood and Tissue Center、網上圖片