新冠疫情肆虐,學生們被逼留喺屋企上網課,不過網課始終唔及實體課,好難集中又好易悶。美國首都華盛頓就有一位高中化學老師將屋企廚房變身成化學實驗室,喺社交平台直播實驗過程,唔單止能夠令學生趣味學習,仲吸引唔少離開校園嘅人觀看添。

化學老師Jonte Lee表示,校長舊年4月建議佢喺網上直播實驗過程,於是佢靈機一觸,就諗到喺屋企廚房教學,Jonte亦因為獲得「廚房化學家」之稱。Jonte就地取材,用廚房嘅材料示範做各種化學實驗,因為一般學生屋企都會有呢啲常見材料,如果學生屋企無材料,佢甚至會自掏腰包買材料送到學生屋企,等佢哋可以跟住做。

Jonte之所以選擇喺社交平台直播,係因為時下年輕人都會用社交媒體,希望咁樣可以融入學生生活,拉近彼此距離。亦因此,Jonte嘅「學生」唔單止來自佢任教嘅高中,連其他學校嘅學生甚至已經離開校園嘅人都鐘意睇,佢更表示,秋天復課後仍會繼續直播,佢希望可以透過影片回饋社會。

圖:Youtube@Education Week