正所謂得人恩果千年記,動物亦有靈性,會記住恩人。泰國曼谷有位獸醫,最近偶遇12年前治療過嘅野生大象,意外嘅係,大象竟然仲記得佢,主動伸長個鼻同佢打招呼、親近佢,令佢覺得非常幸福同不可思議。 

保護野生動物辦事處主任洛獸醫(Pattarapol Maneeon)幾日前喺社交平台分享,近日入森林為野生動物提供援助期間,認出自己喺12年前救過嘅大象Plai Thang。因為Plai Thang發出嘅聲音好獨特,所以洛獸醫認得出,「那一刻大象向我發出了召喚聲,這是我第一次聽到這樣的大象聲。」而Plai Thang亦無忘記恩人,仲伸出長鼻掂洛獸醫隻手同佢打招呼,一人一象久別重逢倍感親切。

洛獸醫指Plai Thang係佢救嘅第一隻野生大象,佢當時出現發燒、厭食、水腫同嚴重貧血等症狀,病到奄奄一息。洛獸醫話佢哋初次見面嗰陣,Plai Thang表現得好有侵略性,但佢嘅身體好虛弱,打唔過其他大象,花咗好長時間先痊癒,「但我們知道牠很聰明,會照顧自己。」12年過去,洛獸醫表示估唔到Plai Thang仲記得自己,互相觸碰嗰一刻非常奇妙。佢指:「我希望這件事鼓勵每一個人,感激他們為大象的付出。」

圖:網上圖片