近年陸續有日本女星宣佈結婚,傷透唔少粉絲們嘅心。日本一間專門負責廣告、MV等創意指導同製作嘅企業HIRORO(ひろろ)就推出一項員工福利,最愛嘅偶像結婚可享有10日有薪假,甚至可視乎傷心程度而延長。就算係第二、第三鐘意嘅偶像退團都可以請3日有薪假,真係恨死隔籬啊!

公司社長鶴見至善本身都係追星族,佢係女歌手村田寬奈嘅粉絲,連公司名都以對方暱稱命名。佢解釋指自己亦曾經歷過幾次偶像團體成員引退或解散,一度無心工作,所以認為休假對追星族嚟講十分必要。佢係公司推出新福利制度指,只要員工最鐘意嘅偶像宣布婚訊、退出所屬團隊或團隊解散,就可享有10日「帶薪療傷假」,假期仲可以視乎傷心程度而延長。員工如果要參加偶像嘅演唱會或見面會,只要喺一星期前提交申請就可以請假。就算係偶像嘅突襲公演或臨時活動,員工都可以喺當日申請早退。

鶴見社長喺社交媒體一公布呢項福利,網友紛紛留言點讚,表示自己都好想喺咁正嘅公司工作。

圖:網上圖片