酒店業競爭激烈,黑龍江省哈爾濱就有一間酒店為吸引住客,推出「北極熊酒店」,主打可以喺房間嘅玻璃窗,全天候觀察北極熊嘅日常生活,被保護動物團體怒轟酒店虐待動物。

哈爾濱極地公園斥資1億人民幣(約1.2億港幣),聘請俄羅斯、日本設計師設計,建造聲稱係全球第一間嘅北極熊酒店,內有冰川、北歐風情等多個主題房間,標榜無論由房間、餐廳都可以360度無死角咁睇北極熊日常生態,仲可以體驗向北極熊餵食。該酒店總經理戴瑞表示:「遊客與北極熊僅一塊玻璃之隔,沒有任何柵欄,遊客觀賞北極熊會非常舒服。」

由網上公開嘅短片、相片可見,北極熊嘅活動空間有限,而佢哋居住嘅地方只係得一個水池,周圍貼上仿北極嘅地板同牆紙。保護動物團體「善待動物組織(PETA)」指出,北極熊每日活動時間長達18小時,更需要數千英里嘅活動範圍,唔應該被困喺動物園或水族館中。仲促請大家遠離該酒店,反對任何機構從動物嘅痛苦中獲利。哈爾濱極地公園發言人指,喺溫度同空氣質素許可下,北極熊會被安排到戶外活動,表示室內區域只係北極熊一部分嘅活動範圍。

圖:中新網、哈爾濱日報