出街染髮價錢較貴,唔少人都會選擇買染髮劑返屋企自己染。消委會就市面上26款聲稱成分「天然」、「草本」、「植物成分」或「有機」嘅染髮劑做測試,發現六成樣本含致敏物質或重金屬。

消委會測試26款售價由18蚊至450蚊不等嘅染髮劑樣本,包括染色護髮素及草本海娜染髮粉等,顏色以黑色同深啡色為主。結果顯示,全部永久性染髮劑被驗出含致敏物質,當中甚至有一半被驗出有3至4種致敏物質,亦有1款樣本含有可導致基因突變、已被歐盟及內地列為不應用於化妝品嘅禁用成份。

結果又發現,1款染色護髮素及4款永久性染髮劑樣本被驗出有阿摩尼亞,但產品包裝並無標示,其中2款嘅包裝更標示為「不含阿摩尼亞」。至於6款草本海娜染髮粉,所有樣有均檢出含鉛,其中「Ling Lee 寧勵(無添加)海靈草染髮粉」發現含有0.043ppm水銀。

消委會提醒,如有濕疹或頭皮表面痕癢、破損,應避免染髮。而用染髮劑時,如感到痕癢、灼熱,應立即用清水清洗,若症狀持續,需盡快求醫。

圖:網上圖片