癌症對人類嘅殺傷力極大,治療癌症嘅副作用亦相當大。香港科技大學嘅研究團隊就發現咗一個新方法,製造出一種以往好難被製造嘅新球形分子「手性四芳基甲烷」(CTAMs)。呢種分子對子宮頸、肺、乳房同腸等癌細胞、引起手足口病嘅病毒,甚至冠狀病毒都有良好嘅抑制作用。

根據初步嘅生物活動研究,CTAMs具有抗癌同抗病毒特性。其中一種球形分子對子宮頸癌細胞所展示嘅抑制能力,功效媲美常用於控制子宮頸癌細胞生長嘅藥物「多柔比星(Doxorubicin)」,其毒性更少28倍,換言之,CTAMs可應用於開發較少副作用嘅癌症藥物。

另外,CTAMs亦能有效對付引致手足口病嘅腸病毒,同埋抑制引致普通感冒病毒嘅複製過程。由於普通感冒病毒屬人類乙型冠狀病毒,有關分子好大機會可用作對付其他冠狀病毒,如引致2019冠狀病毒病(Covid-19)嘅新型冠狀病毒(SAR-CoV-2)。

圖:科大