淋坑山!一個好特別嘅名字,如果唔係天水圍居民,都未必聽過呢個名。淋坑山海拔高81米,位於天水圍西北方的一座小山峰,由天富站出發,大約半個鐘,就可以上山俯瞰后海灣及深圳市景色,亦可以欣賞日落,可以話係天水圍嘅後花園。

想前往淋坑山,大家可以乘坐輕鐵到天富站,落車之後沿天秀路向西行,跨過天水圍河,再橫過天影路到對面馬路,然後轉右直行,就到達淋坑山山腳啦。

淋坑山山腳有一片大爛地,盡頭處就會搵到上山嘅山徑,沿路而上,中間會有分岔口,但其實兩邊都可到達山上,所以大家唔使擔心。不過提提大家,山徑比較多碎沙碎石,而且有少少斜度,上山時唔好一味貪快!

大約行10分鐘,就上到淋坑山山頂啦,山上有一片小平地,大家可以喺度休息,並俯瞰整條深圳灣大橋,盡覽深圳市及后海灣蠔排,由於四周都無其他高山,視線開闊,無遮無擋,景觀一流。

回程可以由原路落山,亦可以由另一邊落山,回到爛地之後,再返回天富站結束行程。

圖片來源:LOOOP.HK

沿著天影路行,會經過一條小路。


行到盡頭會見到一片爛地。


只要穿過這片爛地,盡頭處就會搵到上山嘅山徑。


沿路而上,中間會有分岔口,但其實兩邊都可到達山上。


山徑比較多碎沙碎石,而且有少少斜度,上山切忌貪快!


淋坑山山頂有一片小平地,亦是天水圍居民的晨運樂園。


在山上可以盡覽深圳市及后海灣,由於四周都無其他高山,視線開闊,無遮無擋。


眼前就是一大片蠔排。


亦可以遠眺深圳灣大橋。


黃昏之時,呢度更係睇日落理想地方。