疫情之下,大家都因為需要減少同他人接觸,而未能如常同親友聚會。為此荷蘭一個團隊就設計咗一款出名為「城市太陽」(Urban Sun)嘅紫外光燈,打算藉著燈光殺滅特定空間內嘅新冠病毒,喺公共地方提供一個安全嘅環境比民眾自由交流。


所謂嘅「城市太陽」其實係一個放喺架空電纜上嘅紫外光燈,佢會以222納米特殊波長嘅Far-UVC,喺戶外開放區域射出一個光環,殺死範圍內嘅病毒。由於呢種光波對人類無害,所以民眾就可以企喺「城市太陽」底下進行各種社交活動。


呢個項目嘅發起人 Daan Roosegaarde 亦表示,突如其來嘅疫情將每個人分隔開,我哋嘅世界充斥著塑膠料隔板同保持社交距離嘅標示,就連親朋好友亦變成咗電腦屏幕上嘅像素。所以我哋希望可以成為新常態底下嘅建築師,創造出更好嘅聚會場所。


圖片來源:Studio Roosegaarde