新冠肺炎肆虐全球,打擊全球經濟,韓國嘅零售、飲食業生意亦大受影響。韓國有間連鎖炸雞店嘅分店老闆,一年前為一對兄弟解困,請佢哋食炸雞大餐。估唔到時隔一年後,當年受過幫助嘅哥哥因擔心炸雞店生意受疫情打擊,而寫咗一封感謝信俾老闆,仲話以後大個要成為好似老闆咁熱心助人嘅人,內容感動一眾網民,仲有唔少網民話要「花錢狠狠懲罰」呢間鋪頭,以答謝老闆嘅善心。

根據哥哥嘅手寫信得知,父母喺佢哋年幼時遇上車禍離世,自己同7歲弟弟同埋身體唔好嘅奶奶同住。舊年因為新冠肺炎疫情,哥哥不幸被炒,只能隱瞞年齡去送外賣、賺錢養家。有一日弟弟不停嘈住要食炸雞,佢就拎出之前節衣縮食儲落嘅5000韓圜(約港幣34蚊),帶住弟弟去每間炸雞店,睇睇有無5000韓圜嘅炸雞買。

可惜,兩兄弟走訪多間炸雞店查詢都未能如願,最後嚟到一間連鎖炸雞店門口,老闆見到佢哋就招手叫佢哋入去,仲話唔提供外賣,要兩兄弟坐低慢慢吃,更拎出價格明顯超過5000韓圜嘅大炸雞套餐,又拎多2樽可樂俾佢哋。起初哥哥以為老闆想事後抬價,等佢哋食完炸雞之後收返全額餐費,但佢見到弟弟食得好開心嘅樣又唔忍心叫停佢。2人食飽後,哥哥拎出5000韓圜,但老闆就將錢放返佢手中,話:「我會把收據印出來,你們之後再來買單就好」。哥哥事後亦得知,原來弟弟曾獨自再去過呢間炸雞店,老闆請客後仲帶弟弟去剪頭髮,哥哥表示:「因為好久都沒有感受到這種溫暖,所以過了1年仍然記憶猶新」。

疫情下,哥哥擔心曾幫過佢同弟弟嘅炸雞店生意大減,於是親手寫咗感謝信,坦言希望日後可以成為好似老闆一樣熱心助人嘅大人。炸雞店老闆接受傳媒訪問時亦表示,當日見到兩兄弟喺門外嘅舉動,就大概估到佢哋嘅環境唔好,無諗咁多就拎出店內人氣最高嘅套餐俾佢哋。網友紛紛大讚老闆嘅善舉,更表示要「花錢懲罰」炸雞店,因此該店嘅堂食同外賣客人不絕,仲有人喺店內寄放商品,希望可以轉交俾「炸雞兄弟」。

圖:YouTube@MBCNEWS