近月沙田大會堂出現一個設計亮眼嘅公共長櫈,引起大眾關注。原來該櫈設計同城門河息息相關,背後嘅設計概念仲非常值得大家欣賞同參考。

負責呢個項目嘅係HIR Studio,同康文署合作,負責此次廢膠回收創作項目。該工作室於去年12月喺Facebook專頁上載短片,講解長凳嘅製作過程,利用「取之沙田,用之沙田」嘅環保概念,以城門河為創作靈感,「升級再造」成為公共長凳。

其背後概念用咗一年多嘅時間實現,先用兩個月時間喺沙田社區回收咗大概兩萬個膠樽,然後將呢啲塑膠運送到回收廠,經過分類、加工、再造成原生材料,再設計、倒模成長櫈所需組件,過程艱辛但非常值得。

短片中,設計團隊表示,該櫈設計靈感係來自城門河,希望沙田區民喺大會堂休息時,同時帶來親切感。而該櫈外形嘅起伏就好似河面水波翻騰,自然營造出悠閑嘅私人空間。 

另外,設計團隊希望透過今次嘅計劃,畀市民親眼睇到自己回收嘅成果,令大眾更有動力減廢,亦希望藉此畀市民思考,點樣共建一個更環保同美好嘅生活空間一齊享用。 

圖片來源︰FB@HIR Studio

 



(圖︰由影片中擷取)

(圖︰由影片中擷取)