新冠肺炎持續,令市民嘅日常社交生活大受影響,特別係抵抗力較差嘅長者、殘疾人士等需要長期留喺屋企或院舍。有見及此,保良局同海洋公園合作推出「快樂保‧旅」計劃,推行一系列院舍探訪及表演,等本港唔同社群感受歡樂同關愛。海洋公園亦會為保良局屬下中小學提供保育研究、環保藝術同學生職涯體驗等教學活動,期望喺疫情下為社會帶來正能量。

尋日(10號)下晝,保良局同海洋公園就住「快樂保‧旅」計劃開啟啟動儀式,甫開場就有海洋公園嘅表演團隊表演,而之後表演團隊同動物護理團隊仲會到訪殘疾人士院舍、特殊學校表演,等院友同學生足不出戶就可以欣賞到精彩表演。

海洋公園早前向保良局安老服務院舍及康復服務院舍送贈盤栽,由院舍長者、殘疾人士照顧,綠化院舍嘅同時,亦可以令院友療愈心靈,互相交流種植心得。保良局屬校羅氏基金中學學生之前跟隨海洋公園獸醫、海洋公園保育基金團隊觀察解剖擱淺海豚屍體嘅過程,令學生更深入了解海洋污染對海洋生物嘅影響。之後保良局屬下中學仲會參與體驗海洋公園表演藝術及後台工作坊,更有機會喺園內公開演出。除此之外,海洋公園仲提供職涯體驗等教育活動予學生,等佢哋親身體驗職場世界。

圖:LOOOP