唔少自閉症患者都有過人天賦,英國一個患有自閉症嘅11歲男童Alex Baker,就擁有過目不忘嘅天賦,能夠憑記憶將到訪過嘅城市街景畫出來,超強記憶力令佢嘅父母大為驚訝。

據外媒報道,媽媽Laura Jackson喺Alex 5歲嘅時候,曾帶佢遊倫敦,結果當晚返屋企之後,Alex就畫出倫敦地鐵嘅路線圖。自此,Laura就發現Alex記憶力超強,對好多事物都過目不忘,能夠將只到訪過一次嘅地方,或者將喺書上見到嘅圖畫「複製」出來。

Alex對畫畫好感興趣,會靜靜咁喺房度畫畫幾個鐘,佢尤其鐘意畫城市風景或著名地標,例如巴黎鐵塔、倫敦塔橋、香港景觀等。佢表示倫敦係佢最鐘意嘅城市,因為當地有好多歷史建築。佢更希望之後可以成為藝術家,繼續畫唔同城市嘅風景。Alex父母睇完畫作之後,都為佢感到驕傲。

圖:FB@Laura Jackson