如果喺街邊見到只著一隻鞋嘅老人家,你會點做?台灣有網民即時放低手頭上做緊嘅嘢,為一位執紙皮嘅婆婆送上鞋同麵,而婆婆轉身嘅背影亦令網民諗起遠方嘅阿嬤。

呢位熱心網民上個禮拜喺facebook群組「爆廢公社二館」分享指,自己喺自助洗車場洗車啱啱洗到一半,就見到一位推住推車嚟洗車場執紙皮嘅婆婆。網民心疼佢咁熱嘅天出嚟執紙皮,又見佢雙腳只著一隻鞋,擔心佢隻腳會受傷,於是網民將洗車嘅事放埋一邊,即刻去附近五金鋪買咗對拖鞋同一罐飲品。之後網民諗到婆婆出來一段時間可能有啲肚餓,又走去附近鋪頭買咗碗麵。

網民買齊嘢返嚟發現婆婆好似行開咗,好彩搵咗一輪終於搵返婆婆,就將買嚟嘅拖鞋、飲品、肉羹麵仲有身上找返嚟嘅幾百蚊台幣俾婆婆。婆婆好開心,笑住咁對網民講多謝,網民亦慶幸買嚟嘅拖鞋啱婆婆著。見到婆婆開心嘅樣,網民亦感到開心,只係婆婆轉身嘅背影令佢不禁思念起佢遠方嘅阿嬤。

網友紛紛大讚網民熱心,為婆婆解決燃眉之急:「好心有好報」、「超有愛的」、「非常有愛心,謝謝你」、「優秀,給你一個讚」。亦有網友留言指希望有更多人主動幫助有需要嘅人:「這個社會可以有更多的愛」、「如果是這個情況,不少人會直接走過,幸好有你」、「其實很多老人家也等着別人幫助,但他們不懂說出口」。

圖:FB@爆廢公社二館