觀塘一間食店Manna一直積極參與社區服務,上個禮拜喺社交平台發文指,一位獨居長者,因行動不便每日只能去Manna食一餐新鮮飯,夜晚就食中午買定放落雪櫃嘅快餐。Manna不忍伯伯要捱凍快餐,決定開設送飯服務,為獨居長者送上一點暖意。

食店Manna上個星期三(3號)喺其Facebook專頁分享,一位識咗好耐嘅伯伯,每日下晝都會嚟餐廳吃飯、見下朋友仔,但佢因為行動不便,每日只能夠來一次。餐廳職員好奇伯伯夜晚嗰餐點解決,於是前往探望,發現佢喺雪櫃囤積咗一堆快餐食品,到咗夜晚就拎出來凍食充飢。

貼文指,呢位伯伯同好多長者一樣,都有申請政府送飯服務,但就要排兩年咁耐,宜家唯有自己諗辦法解決一日三餐。職員不忍伯伯要食凍食,最後落街買咗盒新鮮飯俾伯伯食,同時決定開設獨居長者送飯服務,招募送飯員。Manna希望將送飯員培訓成有簡單關顧長者技能、關心獨居長者嘅人,想佢哋除咗為長者送上熱飯之外,亦可以陪長者傾下計。

Manna表示,盒飯本身可能只係收長者20蚊或者免費,宜家仲要請埋人送埋上去,其實真係唔會計得掂條數。不過佢哋依然想盡力去試,回應社區需要。宜家Manna正招募送飯義工,希望集結有心人幫助呢班弱勢社群。

圖:FB@Manna。嗎哪