我哋好多時都會透過睇返先人嘅相嚟懷念先人,以色列一間網上族譜公司My Heritage早前公布咗一項叫做「深度懷舊」(Deep Nostalgia)嘅人工智能(AI)技術,可以容許用家免費上傳先人嘅相,再透過AI技術將相變成動圖,製成品仲非常生動!有網民利用呢個技術緬懷已故親人,但亦有人指效果令人毛骨悚然。

「深度懷舊」透過人工智能同機器深度學習技術,追蹤、活化相入面嘅人像,令相、雕塑、畫像中嘅人物「復活」。My Heritage希望透過新研發嘅技術,等用家可以令心愛嘅先人「起死回生」,並探索家族歷史。用家只要喺網站註冊一個賬號,再上傳相片就可以即刻收到「動畫化」嘅製成品。

唔少網民都參與過「深度懷舊」,指成品非常生動,好似故人再次返生咁!亦有網民利用「深度懷舊」製作著名畫作《蒙娜麗莎》、大衞雕像嘅動圖,表示其空洞眼神、詭異微笑相當嚇人。

圖:My Heritage