依家賺錢或抒發渠道真係千奇百趣,或許現代人生活壓力大,需求都零捨唔同!

前有「誇誇群」,依家有「虛擬戀人」服務,真係夠哂「別出心裁」。 

據《錢江晚報》報道,某網購平台上搜索「虛擬戀人」字樣,一間五年老店會提供相關服務。店舖首頁有兩個鏈接,分別係「小哥哥我們等你回家」同「打賞您的小可愛」,可以精準對應目標用戶需求。另外,用70蚊(人民幣)就可以享受到60分鐘嘅「戀愛服務」。 

報道又指,店家會預先喺微信建立群組,群組中有店家、客戶以及幾名「虛擬戀人」。店家會先要求「虛擬戀人」每人發送一條語音同一張相,畀客戶選擇,如果客戶對「虛擬戀人」質素唔滿意,店家會另外邀請其他「虛擬戀人」入群。揀好「虛擬戀人」後,服務先正式開始。 

據報道,記者所實測嘅「虛擬戀人」現實為自由職業者,佢表示晚上係接單高峰期,通常搵佢扮演男朋友基本上都係大學生或者係很忙很累嘅上班族。此外,記者發現溝通時間差唔多一個鐘嘅時候,該「虛擬戀人」就會向客戶發語音詢問「小姐姐,一個小時到了,你看看要不要續一下時長」,「虛擬戀人」似乎有自己嘅一套流程。喺呢一個鐘內,「虛擬戀人」共發出咗50條語音。 

據了解,「虛擬戀人」原來早喺十年前就有出現電腦遊戲中。隨着社會發展,以及年輕人多元化需求嘅增加,「虛擬戀人」成為新興事物,並得到年輕人青睞。但對於出現「虛擬戀人」服務嘅評價就眾說紛紜,有人認為「能夠讓年輕人傾吐心事、釋放壓力的一種新的交流渠道」,但都有人認為咁做好廉價同無厘頭。 

圖片來源︰Unsplash@robin_rednine