好多產品嘅包裝都係用塑膠製成,所以當包裝被拆開丟棄後就會變成塑膠垃圾,影響生態環境。菲律賓設計師Pat Mangulabnan為此研發一種環保包裝盒Sprout,當包裝完成保護盒內零食嘅任務之後,搖身一變就可以埋入土中,盒內嘅種子就會生出一棵新植物,唔會破壞環境之餘仲有助綠化環境添!

呢種叫做Sprout嘅環保包裝盒,係用當地盛產嘅菠蘿嘅葉循環製成,裏面收埋能夠種植嘅種子。為提高種子生長嘅成功率,盒上嘅圖文採用有機大豆油墨印刷,包裝紙亦係以食用澱粉製成。當用家食完環保包裝盒內嘅食物後,就可以依指示將個盒摺疊種入土中,盒入面嘅種子之後會發芽生長,盒則成為養分被植物吸收,再次進入大自然嘅生態循環當中。呢個設計唔單止對環境有益,Pat Mangulabnan更希望透過用家同包裝盒間嘅互動,喚起佢哋對環保嘅責任,避免做亂拋垃圾等破壞環境嘅行為。

圖:IG@patmangu