新冠肺炎打擊全球經濟,日本大阪有間叫「ジオラマ食堂」嘅餐廳亦因此面臨倒閉危機,估唔到因為店長寺岡直樹收養咗幾隻流浪貓,從此改變咗餐廳嘅命運!

呢間餐廳因店內陳列嘅鐵道模型,喺鐵道愛好者之中小有名氣,疫情前嘅生意都唔錯。但受到新冠疫情影響,餐廳生意一落千丈,店長寺岡直樹甚至已經有關鋪嘅念頭。不過就喺舊年年中,店長喺無意間發現一隻淋緊雨、幾乎瀕死嘅貓仔。店長於心不忍,救咗貓仔返去,結果呢隻貓仔嘅媽媽就成日嚟鋪頭探訪,再加上店長後來又執到嘅三隻貓BB,店內突然多咗五隻貓貓。雖然要照顧貓貓嘅過程唔容易,但店長亦樂在其中,更不時將同貓貓相處嘅相、短片放上社交媒體分享,結果竟然引起網友熱烈回應。

其中以貓咪同鐵道模型嘅相最紅,貓咪喺模型火車入面就好似「進擊的巨貓」咁入侵火車月台、推跌火車,強烈嘅對比受到好多粉絲喜愛,更帶動咗餐廳嘅人氣。好多新舊粉絲紛紛嚟幫襯,令餐廳解除咗可能執笠嘅危機。

店長表示:「我本來是想幫助這些貓的,結果反而得到了幫助。這些貓咪家族帶給我活下去的希望,也要感謝網友粉絲的相挺」。雖然貓咪成日喺模型上搞搞震、甚至破壞模型,但一向珍惜模型嘅店長亦只能無奈表示:「因為貓咪很可愛,所以沒關係我來修!」

圖:twitter@ジオラマ食堂diorama restaurant