近期興起行山熱,不過其實想行山,又唔一定要去到山旮旯咁遠,近近哋一樣可以輕鬆郊遊,例如何文田後山就有一條小山徑通往採石山,仲可以遠眺郵輪碼頭添!

採石山又名紅燈山,因為喺啟德機場時代,曾經建有為機場航班指示用嘅大光燈,因而得名。採石山唔算太高,只有107米,而且路線完整,極為易行,就算行山初哥都輕鬆可到。

大家只要嚟到何文田站A2出口,一出就係佛光街,出口旁有條寬闊嘅梯級,大家沿梯級上,就會到達東何文田配水庫遊樂場,見到涼亭之後右轉,繞過配水庫遊樂場,就到達常樂街花園啦!

穿過常樂街花園,就會見到綠色鐵欄,喺綠色鐵欄後就係上採石山嘅山徑入口,不過梯級非常狹窄,一定要小心翼翼咁行。沿路可以望到九龍東,更可眺望郵輪碼頭,上到最頂就係採石山山頂,係一個草地球場,同時係何文田上配水庫遊樂場。配水庫四通八達,有好多觀景位,亦有休息嘅位置,大家可以隨意在此閒逛,逐一探索,參觀過後可沿路落返何文田港鐵站。

圖片來源:LOOOP.HK


只要嚟到何文田站A2出口,一出就係佛光街,出口旁有條寬闊嘅梯級。


沿梯級上就會到達東何文田配水庫遊樂場,見到涼亭之後右轉。


常樂街花園有道綠色鐵欄,鐵欄後就係上採石山嘅山徑入口。


不過梯級非常狹窄,一定要小心翼翼咁行。


沿路可以望到九龍東,更可眺望郵輪碼頭。


上到最頂就係採石山山頂,同時係何文田上配水庫遊樂場。


配水庫四通八達,有好多觀景位。


山上亦有唔少休息嘅位置,大家可以隨意閒逛,逐一探索。


採石山路線圖