疫情肆虐,大家更重視日常環境嘅清潔,但有時空間太大、空隙太多未必可經常清潔到。嶺南大學(嶺大)繼上年研發UVC紫外光消毒燈後,今年更設計咗專為大型場所而設嘅智能紫外光消毒機械人,可提供自動嘅全方位消毒服務,全程無需人手操作,其效能遠勝用人手1:99漂白水消毒,速度仲快5倍添。

智能紫外光消毒機械人透過波長253.7nm嘅紫外光燈,破壞有害微生物嘅遺傳物質,可殺滅99%病毒、細菌同真菌。佢用360°全方位紫外光照射消毒,更容易消毒到每個角落,加上機械人採用全自動技術,無需人手操作,節省人手嘅同時,亦避免人長時間暴露喺紫外光底下,令人體皮膚同眼睛受傷。

機械人更配備光學雷達,可透過激光地圖測繪,掃描附近地形同障礙物以規劃消毒路線,當檢測到人或動物嗰陣能夠即刻停止運作,確保安全,尤其適合消毒學校、護老院、復康院舍、圖書館、運動場館等大型場所。消毒機械人喺400平方呎嘅空間做消毒,只需10分鐘,就可以將每個角落消毒乾淨,省時方便。

嶺大創業行動總監高永賢博士表示,嶺大正尋求資助,計劃喺今年內生產50部智能紫外光消毒機械人,期望為學校、院舍及非牟利機構提供免費消毒服務。長遠嚟講,更希望以社企形式營運,為唔同大型場所如酒店、旅館等私營機構提供服務,所得收益及捐款將用作量產智能紫外光機器人,為更多機構提供消毒服務,以減低新型冠狀病毒嘅傳播風險,保障市民嘅健康。

圖:嶺大