隨住科技越來越發達,去太空旅行已經唔係夢,美國加州一間太空科技公司就計劃喺距離地球500至550km嘅近地軌道上,建造第一座豪華太空酒店。酒店居住空間達11600平方米,最多可以容納400人,預計喺2027年投入營運,落成後將成為太空入面最大嘅人造物。

太空酒店以環形設計,透過不停旋轉產生人造重力,等旅客同職員可以喺月球重力,即地球40%重力下長期喺酒店逗留。酒店外圍有24個長20m、寬12m嘅吊艙,分別用作酒店房間、戲院等,而酒店內亦有健身房、餐廳、圖書館、水療、酒吧等設施。

呢座太空酒店係由軌道組裝公司(OAC)嘅Voyager Station小組研擬,成員包括美國太空總署(NASA)嘅退休軍人、飛行員、工程師同建築師等。小組計劃喺2025年,將多個預製組件送上近地軌道,再由重型機械人組合成一間直徑61m嘅環狀巨型太空酒店。

圖:voyagerstation網頁