青少年踏入青春期難免有啲叛逆,呢個時候如果懲罰、鬧佢哋,反而適得其反。美國有個13歲嘅中學生Anthony Moore因為剪咗個唔滿意嘅髮型,不惜違反校規戴住帽返學,點勸都唔肯除帽。校長Jason Smith插手事件,得知Moore戴帽嘅原因後更出手幫佢剪頭髮,免除Moore受罰嘅危機,校長嘅舉動獲網友一致好評,形容呢啲先係真正嘅教育。

Moore因為戴住帽返學而觸犯校規,訓導主任同佢傾咗30分鐘,佢堅持唔肯除帽。校長於是問佢唔肯除帽嘅原因,Moore先解釋父母帶佢去剪頭髮,而佢好唔鐘意個新髮型。雖然校長同訓導主任都覺得Moore嘅新髮型好睇,但校長認為一個13、14歲嘅青少年,會更在意同輩認可,而唔係成年人嘅認可。於是校長俾Moore睇佢囝囝嘅相同埋自己大學嗰陣嘅剪髮相,同Moore講:「我在你這年紀就開始幫人剪頭髮,如果我現在跑回家拿剃刀來修你的髮線,你願意回教室嗎?」Moore猶豫咗下就同意呢個提議。

校長之後飛奔返屋企拎剃刀,征求Moore父母同意後幫Moore剪頭髮,Moore剪完頭髮後亦願意除帽繼續上堂。校長指自己好理解Moore嘅感受,「溝通才能讓我們理解行為。當學生陷入掙扎時,我們得自問這孩子發生了什麼,而不是孩子有什麼問題。教育最終目的是要讓孩子努力滿足自我需求。」唔少網友,特別係媽媽網民都大讚校長嘅做法,Moore既唔使受罰,同時又解決咗佢嘅煩惱:「校長行為看似微不足道,但他能這麼同理這年齡層孩子重視外表跟自尊的心,實在是很棒的教育人!」

圖:FB@Lewis Speaks Sr.