相信唔少人都會認為結婚作為人生大事,一場盛大嘅婚禮同一輯漂亮嘅婚紗相都係必不可少。不過對於菲律賓一對貧困夫婦嚟講,呢啲只係一個奢侈嘅夢想,而佢哋只有喺獲好心人資助下,先至有機會喺結婚24年後補拍婚紗相同補辦婚禮,並成功圓夢。


55歲嘅丈夫 Rommel Basco 同50歲嘅妻子 Rosalyn Ferrer 早喺24年前結婚,但由於兩人以執垃圾維生,所以收入微薄嘅佢哋不但無舉行過婚禮,甚至連結婚證書都無。而當地一間髮型屋嘅老闆 Richard Strandz 知道此事後,就決定與經營婚慶用品嘅朋友商議,並決定為夫婦兩人拍攝婚照,以及舉辦婚禮。


夫婦兩人知道自己可以舉辦婚禮後都感動不已,Rosalyn 更表示自己小時候就幻想過披着白婚紗出嫁嘅場面,十分感謝好心人令佢嘅願望可以成真。而 Strandz 就認為無論富或貧,真正嘅愛情都值得慶祝,而自己隨後亦會同友人支付租用教堂嘅費用,幫助兩人舉辦婚禮。


圖片來源:Facebook@Allahumma ighfirli Aisha