喺新冠肺炎疫情爆發前,機師都係出名嘅高薪筍工,但日本有位準機師竟然放棄呢份筍工,每日省吃儉用,租一間只有35呎嘅房間追夢,究竟係咩原因令佢放棄機師,佢又係為咗追咩夢?

日本節目《幸せ!ボンビーガール》訪問咗一位住喺京都一間100年樓齡舊屋嘅「貧窮青年」直樹,27歲嘅直樹喺東京大學畢業,係個名副其實嘅高材生。直樹一畢業已經係機師實習生,只差一年就成為年薪起碼2000至3000萬円(約港幣146-219萬)嘅正式機師,每天過住無憂無慮嘅奢侈生活。但直樹毅然放棄咗呢種生活,搬嚟呢間同人合租嘅舊屋,每月用3萬円(約港幣2100)租一間35呎嘅房間,每餐只用幾十円解決,衫褲得幾件,連電腦跌爛都唔捨得換,盡量慳得就慳。

慳得咁辛苦究竟為乜?原來直樹係為咗用自己嘅力量幫助第三世界國家嘅貧困小朋友,等佢哋唔再因缺水缺糧而受苦。呢個諗法嚟自直樹嘅護士媽媽,只要醫生需要人手,直樹媽媽都會毫不猶豫咁出門幫手。直樹曾經問過媽媽,點解要咁努力工作?媽媽就答佢,因為我哋喺生活上一直受到唔同人嘅照顧,所以佢都想用自己嘅方式去幫其他人,回饋社會。受媽媽影響,直樹決定犧牲自己嘅安穩生活,去追求更有意義嘅夢想。直樹希望由根源上提高第三世界國家嘅生活,佢想由教育出發,等佢哋可以學識利用當地資源創業,靠自己嘅力量脫貧。雖然佢無詳細解釋點樣具體幫第三世界國家嘅小朋友脫貧,但現場嘅主持人同嘉賓知道佢嘅夢想之後,都不禁驚嘆:「你真的太偉大了!」

圖:《幸せ!ボンビーガール》截圖