宜家晚市放寬咗堂食限制,多咗人出街食飯,但大家有無諗過,我哋可以坐喺餐廳食飯並唔係必然,因為好多基層市民佢哋可能已經成年無出過街食飯。社企銀杏館上個禮拜推出「愛分享社區飯堂」,為呢班有需要嘅人提供免費堂食服務。

銀杏館日前喺社交平台發文分享,「愛分享社區飯堂」推出後,弱勢社群陸續嚟登記,首日就有一位阿姨嚟辦理手續,社工批核咗佢嘅申請當晚,佢留低享用晚膳。銀杏館職員遞咗一份晚膳俾佢,點知佢食咗幾啖後,突然雙眼通紅流出眼淚。職員即刻上前慰問,阿姨激動到捉住佢隻手誠懇道謝:「真係好多謝你哋!妳知道嗎,我已經足足有一年沒外出吃飯……」銀杏館感慨表示,一餐簡單飯菜,對好多人來講可能微不足道,但對基層來講,卻可以帶來無限安慰。銀杏館希望「社區飯堂」可以為更多有需要人士提供服務,令更多人感受到呢一份愛。

如果大家都想支持呢個咁有意義嘅新服務,可瀏覽:

https://www.love.org.hk/sharelove

圖:FB@銀杏館