相信唔少人都聽過嘉道理農場,但你又知唔知農場除咗有動物睇之外,仲有好多唔同嘅景點位於農場嘅「上山區」呢?早前小編趁住農場重開,到訪「上山區」3個必行景點,大家一齊睇下有幾吸引啦。


1)吊鐘路


農場內種植咗各式各樣嘅花卉,每個月都有不同嘅花綻放,而現時更係欣賞吊鐘花嘅最好時間。「吊鐘路」入口處在胡廷生紀念亭至觀音山山頂之間,附近有指示牌示意其位置。遊客可以沿著小徑一路直入,欣賞一下呢種深受遊人歡迎嘅中國新年花。 



記住喺賞花嘅同時都要保持園區清潔,唔好隨意丟棄口罩、紙巾等垃圾。


2)觀音山


觀音山高550米,係農場內嘅第2高點。遊客只要沿著迂迴曲折嘅道路上山,行走9公里左右,就可抵觀音山頂峰,飽覽成個新界嘅廣闊美景。山頂除咗有一個觀音像外,更有一對龍鳳柱,象徵繁華、長壽與和諧。



山頂一處叢林內更有四個名為「熱氣洞」嘅洞口,會持續釋出暖氣。不過熱氣嘅來源仍是一個謎,農場嘅工作人員估計來自地下深處,或由於炎熱嘅夏天高溫儲藏在山內,其後慢慢釋放。


3)嘉道理兄弟紀念亭


矗立喺山峰高處嘅紀念亭建於1997年, 以紀念農場創辦人賀理士爵士及羅蘭士勳爵,而紀念亭嘅雙頂設計更象徵兩人深厚的手足情誼。由於紀念亭同時係農場內嘅最高點,所以遊客上到去即可俯瞰到整個農場和新界西北部。



遊客除咗可以喺下山區用一小時步行至紀念亭外,亦可乘搭園內觀光巴士,於「嘉道理兄弟紀念亭」站下車後。


圖片來源:嘉道理農場