新冠肺炎肆虐期間,全球各地封城嘅封城,封關嘅封關,學生亦被逼在家上課。英國薩默塞特郡巴斯一個8歲小朋友Pearl Parkin就忽發奇想,用屋企現成物資,打扮成名人同電影角色,為英國救助兒童會籌款。佢原定下個月8號學校復課前,籌到1000英鎊(約1.1萬港幣)善款,點知短短20幾日已經超額籌得超過6000英鎊(約6.5萬港幣)。

由於英國封城,Pearl留喺屋企覺得好無聊,於是就同10歲嘅哥哥Elliot諗到打扮成名人嚟籌款,佢cosplay過嘅名人或角色有美國天后Lady GaGa、英國已故歌手David Bowie、《哈利波特》嘅石內卜教授、荷蘭畫家弗米爾嘅名作《戴珍珠耳環的少女》等。

Pearl表示,好多人因為疫情無法外出而忽略咗打扮,佢認為每日悉心打扮可以令人提起精神,所以選擇呢種方式籌款。佢計劃喺復課前打扮成33個人物,並籌到1000英鎊,不過日前英國救助兒童會已宣佈Pearl超額籌到逾6000英鎊善款。Pearl受訪嗰陣話:「我喜歡設計服裝,尋找服裝也很有趣。我想為世界各地因新冠肺炎需要幫助的兒童及難民籌款。」英國救助兒童會感謝Pearl嘅善舉,更大讚其自製服裝有特色。

圖:IG@pearldressingup