內地男女人口比例嚴重失衡,導致好多男子到咗適婚年齡都娶唔到老婆,湖北武漢有個男子更因此向政府求助,希望政府可以分配一個老婆俾佢。武漢市政府梗係企硬唔幫喇,仲建議男子多同異性接觸,大膽追求。事件引起網民熱烈討論,好多人覺得男子嘅行為不可取,有網民更建議佢獨立啲。

呢名男子通過武漢城市留言報求助,話自己係武漢本地人,27歲身高174cm,大學本科畢業,之前去上海打工3年,大概儲咗25萬人民幣(約30萬港幣),仲有一套新裝修嘅新婚樓。佢話今年返武漢工作,想結婚但苦於無人介紹對象俾佢識,加上屋企人催促,所以希望政府可以分配一個對象俾佢,仲希望可以搵一個善良嘅女仔。武漢市政府之後回覆男子:《婚姻法》規定婚姻自由,禁止包辦婚姻,建議男子多同異性接觸,大膽追求,或通過親戚朋友、正規嘅婚姻中介、婚戀網站識女仔。

有網民批評男子看待女性如貨物:「女人是資源嗎?有把當人嗎?還請求分配?真的看笑了」,亦有人認為男子應該學會獨立自主:「有房有存款自己過不香嗎,甚麼時候學會獨立一點」。

圖:網上圖片、微博@頭條新聞