相信大部份打工仔唔想返工嘅時候都會選擇「射波」,但美國一位打工仔近日竟然另有妙計,決定以一宗自編自導自演嘅「綁架案」去逃避工作。不過,警方好快就發現咗事情嘅真相,並以涉嫌報假案將佢拘捕,而佢亦被任職嘅工廠「炒魷魚」,可以話係得不償失。


根據外媒報道,19歲工廠嘅工人 Brandon Soules 於今個月10號被民眾發現昏倒喺路邊,而佢被警方救出後就聲稱自己嘅父親是一名富翁,而事發時有2名蒙面男子想綁架佢。Brandon 更指,綁匪曾不斷毆打佢,而佢哋將佢打至昏迷後就將佢移到附近一座水塔。


警方得到 Brandon 嘅口供後隨即展開調查,但佢哋喺翻查閉路電視嘅時候,根本無發現 Brandon 口中嘅綁匪。於是佢哋對 Brandon 嘅講法起疑,並同佢當面對質。最後 Brandon 亦坦承自己並無被綁架,一齊都係他為咗唔想返工而編造出來嘅。


圖片來源:Coolidge Police