英國一位黑人女子從小就因為膚色與父母唔同而飽受困擾,雖然佢嘅父母一直都以「隔代遺傳」去解釋,但喺好奇心驅使底下,佢依然選擇喺爸爸罹癌逝世後,以DNA測試嘗試搵出自己嘅真世身世。估唔到佢竟然因此揭開咗母親嘅一個謊言,並發現咗自己嘅生父原來另有其人。


今年28歲嘅 Georgina Lawton 近日出版咗一本自傳,講述自己嘅成長故事,以及身世之謎。而書中提到 Georgina 嘅父母都係白人,但由母親懷胎十月生落嚟嘅佢,就出奇地係一個黑人,並擁有黑色捲髮同棕色眼睛。


不過 Georgina 嘅父親對此沒有任何懷疑,佢甚至相信女兒嘅誕生係一個「醫學奇跡」,並悉心地照顧 Georgina,令佢可以幸福健康地成長。而面對外人嘅質疑,家人就通通以罕見嘅「隔代遺傳」去解釋,指母親嘅家族來自愛爾蘭一個名叫Spanish Point嘅小鎮,而當地人大多是多種族混血。


雖然父親一直都將 Georgina 視如己出,但佢依然對自己身世充滿疑問,而喺父親罹癌逝世後,佢更加決定要透過DNA測試搵出真相。最後,鑒定結果竟然顯示 Georgina 嘅生父另有其人,而佢同母親對質後,母親亦承認年輕時曾與一名黑人男子發生關係。


成功揭開自己身世之謎後嘅 Georgina 坦言,自己一開始完全無法接受。不過幾年後佢亦放低咗此事,並與其他家人回復聯絡。而佢同時決左將自己嘅故事寫入自傳,希望通過自己嘅遭遇,幫助其他對自己身份有疑問嘅人搵到自己。


圖片來源:Twitter@GeorginaLawton