內地交通網絡越來越發達,日前廣州舉行咗《粵港澳大灣區發展規劃綱要》發布會,會上提到,廣州地鐵22號線將延伸至深圳,同深圳地鐵18號線對接,推進兩地之間嘅交通樞紐建設,同時帶動南沙兌現灣區幾何中心嘅區位價值。

據內地傳媒報道,廣州地鐵22號線定位係時速160km嘅「地下高鐵」,目標係實現由廣州市中心只要用20分鐘就到達廣州南沙區。據了解,廣州地鐵22號線正喺建設當中,截至上月底,全線土建工程已完成57%,其中長達18.2km嘅番禺廣場至陳頭崗嘅地段將力爭喺今年開通。

有關草案顯示,廣州地鐵22號線未來或南延至慶盛站、蕉門、南沙客運港,跨海連接東莞,再經東莞濱海灣站繼續東延至深圳沙井站,同深圳地鐵18號線對接,可到達高鐵光明城站。呢個草案同時可以兌現南沙喺大灣區內嘅區位價值,有利實現人才流通、產業協作互補。

圖:新華網